Kino Lumbardhi do të mbyllet në fillim të muajit qershor për shkak se do të hyjë në procesin e renovimit. Procesi i gjatë nëpër të cilin kemi kaluar për të siguruar një marrëveshje për mbylljen e ndërtesës së Kino Lumbardhit, e hapur në vitin 1952 e prej andej, ka përshkuar një mori të shndërrimeve dhe përdorimeve si kinema, hapësirë kulturore dhe vend për shoqërim, kulminohet me dakordësimin me Ministrinë e Kulturës, Rinisë dhe Sportit të Republikës së Kosovës.
Prej vitit 2015, pas përpjekjeve të mëdha të komunitetit kulturor e artistik në Kosovë, rajon dhe anembanë për të ndalur procesin e privatizimit dhe zhbërjes së kësaj ndërtese historike e ikonike në qytetin e Prizrenit, Fondacioni Lumbardhi ka operuar në hapësirë me synim të rijetësimit të traditës së të parit filma dhe të krijuarit momente të reja për kulturë dhe shoqërim.
Me rastin e mbylljes së ndërtesës fizike të kinemasë, Fondacioni Lumbardhi ka përgatitur një program 4 ditor, në datat 25, 28, 30 dhe 31 maj, për t’u takuar për herë të fundit në këtë hapësirë e cila do të ndryshojë prej muajit qershor.
Programi i javës përmbyllëse përfshin shfaqje të filmave, koncerte muzikore dhe takime me komunitetin për t’u përshëndetur me këtë hapësirë si e njohim si dhe për të dhënë një ogur të mirë për kapitujt e ardhshëm të saj.
PROGRAMI
25.05 20:30
Shfaqje filmi - Beynelmilel (The International) me regji të Sırrı Süreyya Önder, Muharrem Gülmez - Kino Bahce
28.05 20:30
Shfaqje filmi - Una vida util (A useful life) me regjit të Federico Veiroy - Kino Bahce
30.05 20:30
Koncert: Baba Zula dhe Gipsy Groove - Kino Bahce
(Biletat për këtë event kushtojnë 10 euro dhe mund të merren vetëm pranë Kino Lumbardhit në Prizren, ose duke i rezervuar ato në DM në Instagram ose në info@lumbardhi.org
31.05
18:00 - Ceremonia e mbylljes (vetëm me ftesa)
19:00 - Shfaqje të filmave - Por primera vez (For the first time) me regji të Octavio Cortazar; Lampa cu caciula (The tube with a hat) me regji të Radu Jude; Prizrenski Motivi (Prizren Motifs) me regji të Živorad 'Žika' Mitrović.
20:00 - Reception
20:00 - Erteller Dj Set nga Esma dhe Murat Ertel
Katër rezidentët tanë të programit OPE.N në Prizren: Antonela Solenički, Francisco Tomsich, Maja Bojanić dhe Una Štalcar-Furač janë drejt fundit të qëndrimit të tyre pesë javor dhe javën e ardhshme më 18 prill ju ftojmë të gjithëve të jeni pjesë e prezantimeve finale të punimeve të tyre.
“Jashtë parashikimeve” eksploron se si artistët përvetësojnë, ripërdorin dhe ‘vjedhin’ – qofshin materiale, hapësira apo rrëfime – për të përkapur kuptimin dhe për t’u orientuar drejt paqëndrueshmërisë. Ekspozita do të rrëfejë më shumë mbi udhën drejt mbijetesës kulturore si një strategji mbi të përshtaturit dhe të rikrijuarit brenda konteksteve të ndryshueshme.
Programi i rezidencës mbështetet nga projekti OPE.N dhe bashkëfinancohet nga fonder e Bashkimit Evropian.
Lumbardhi 101 është një seminar hulumtues me fokus në lumin Lumbardhi, një aspekt jetëdhënës, dinamik, por shpesh i mënjanuar i qytetit të Prizrenit.
Dikur në qendër të strukturës sociale, kulturore dhe ekologjike të qytetit, lumi i mbushur me peshq, zogj dhe notarë, e fuqizoi qytetin me energji elektrike, duke mbajtur mbi 40 mullinj, ndërsa kalonte nëpër kopshte dhe rrugë, duke qenë pjesë thelbësore e jetës urbane dhe kujtesës kolektive.
Në fund të shekullit të kaluar, në përgjigje të ndërhyrjeve në strukturën e saj, lumi e “shkatërroi” urën ikonike të Gurit dhe jetuar kështu një jetë të përveçme e të shkëputur nga shoqëria.
Edhe pse vlerësohet dhe vihet sërish në kontakt përmes festivaleve dhe bienales së qytetit, në ditët e sotme, lumi është kthyer një depo lëvizëse e mbetjeve toksike, pasi biodiversiteti i tij është varfëruar, qasshmëria në të është kufizuar dhe roli i tij në jetën e përditshme të qytetit është zbehur.
Ky seminar synon të tërheqë vëmendjen ndaj Lumbardhit dhe ta mendojë atë si një hapësirë të përbashkët - jo thjesht një burim, por një vend kujtese, lidhjeje dhe rigjenerimi të mundshëm ekologjik.
Duke bashkuar mendimtarë dhe praktikues nga fusha të tilla si ekologjia, antropologjia, ekolinguistika, arkitektura, urbanizmi dhe artet, ai synon të grumbullojë dhe shkëmbejë njohuri, të ndajë gjetjet fillestare të kërkimeve të reja, të eksplorojë perspektivat e trashëgimisë ujore, infrastrukturës, biologjisë, gjuhës dhe jetës urbane për të frymëzuar mënyra të reja të të menduarit dhe të jetuarit me lumin.
Përmes kërkimit, dialogut dhe përvojave të përbashkëta, seminari synon të rilidhë banorët dhe sendet me ujërat e Lumbardhit dhe të imagjinojë të ardhmen e tij të mundshme.
11 PRILL
10:15 - Hyrje dhe prezantim nga Ares Shporta
10:30 - 11:15 - Perspektiva ekolinguistike për vend-botën e Prizrenit nga Stephen Cowley
11: 25 - 11:40 - Procese të gjuhës dhe nisma për lumin: raportim nga terreni nga Fisnik Eger
11:40 - 12:20 - Mbi praninë e Lumbardhit në jetën e Qytetit nga Nebi Bardhoshi
12:25 - 12:50 - Një hulumtim fotografik i lumit Lumbardhi nga Ferdi Limani
14:00 - 14:40 Rajoni i Prizrenit: Një udhëkryq i biodiversitetit, kulturës dhe trashëgimisë nga Bledar Pulaj
14:50 - 15:20 - Lumbardhi dhe transformimi urban nga Artnet Haskuka
15:30 - 16:00 - Mbi Bistricën e Bekim Fehmiut nga Blerina Kanxha
12 PRILL
10:00 - 10:40 - Peizazhe liqenore të shartuar: diga moderne në lumenj pa moshë nga Aslıhan Demirtaş
10:50 - 11:30 - Teknologji jo-perëndimore për një jetë të mirë nga Ovidiu Tichindeleanu
11:40 - 12:20 Danube Transformation Agency for Agency nga Lena Violetta Leitner
LIGJËRUESIT
STEPHEN COWLEY
Profesor Emeritus në Universitetin e Danimarkës Jugore. Karriera e tij është zhvilluar në Itali, Suedi, ish-Jugosllavi, Afrikën e Jugut, Mbretërinë e Bashkuar dhe Danimarkë.
Gjatë viteve të paharrueshme 1982-1984 ka dhënë mësim në Prizren. Ndërsa u përpoq të mësonte shqipen, por dështoi me turqishten gegë e prizrenase, vazhdoi këtë rrugëtim gjuhësor drejt pyetjeve të paeksploruara. Ky hulumtim e çoi atë në pikëpamje të shpejta dhe ndërdisiplinore të gjuhës, në mendje dhe, natyrisht, në mënyrën se si të qenit përshtatet në vetë jetën.
FISNIK EGER
Fisnik Egër është i diplomuar në Psikologji, dhe fokusohet në kulturë dhe hulumtim. Si pjesë e Fondacionit Lumbardhi, ai ka punuar nën mentorimin e Stephen Cowley për të eksploruar se si gjuha ndikon në perceptimin dhe marrëdhënien tonë me lumin.
NEBI BARDHOSHI
Nebi Bardhoshi është studiues i antropologjisë socio-kulturore, me interesa specifike kërkimore në antropologjinë juridike dhe politike, antropologjinë e natyrës dhe historinë e mendimit antropologjik.
Bardhoshi është autor i disa librave, duke përfshirë “Gurët e Kufirit: Kanuni, Prona, Strukturimi Social” (2011), “Antropologjia e Kanunit” (2015) dhe “Etnografia në diktaturë: Dituria, shteti, holokausti ynë” (2018, me bashkëautor). Ai gjithashtu ka botuar artikuj të shumtë akademikë dhe ka shërbyer si redaktor i vëllimeve të ndryshme për shoqërinë shqiptare si dhe për rajonin më të gjerë të Ballkanit dhe Mesdheut.
FERDI LIMANI
Ferdi Limani e filloi karrierën e tij në fotografi ndërsa punonte si asistent për fotoreporterë të huaj. I shtyrë nga një ndjenjë e thellë drejtësie dhe zemërimi, si adoleshent ai mori një kamerë për të dokumentuar mizoritë e kryera kundër popullit të tij.
Ky pasion e shtyu atë të studionte gazetari dhe të punonte me mediat vendase dhe ndërkombëtare. Në vitin 2008, pasi u përzgjodh për të dokumentuar shpalljen e pavarësisë së Kosovës, ai u largua nga vendi, duke vazhduar punën e tij si fotoreporter në Francë dhe më pas në Turqi dhe Siri. Pas kthimit në Kosovë, ai është fokusuar në krijimin e një arkivi të konsiderueshëm fotografik të një shoqërie kosovare dhe ballkanike që ndryshon me shpejtësi.
BLEDAR PULAJ
Bledar Pulaj, lindur dhe rritur në Prizren, është biolog, asistent pedagogjik dhe kandidat për doktoraturë, i specializuar në ekologjinë e bimëve, filogjeninë e bimëve, fitokimi, etnobotani dhe ruajtjen e biodiversitetit.
Me mbi një dekadë përvojë akademike, kërkimore dhe projektore, ai është autor dhe bashkautor i publikimeve të shumta shkencore dhe ka kontribuar në iniciativat e biodiversitetit në mbarë Kosovën dhe Ballkanin.
ARTNET HASKUKA
Artnet Haskuka është një arkitekte, urbaniste dhe profesioniste e trashëgimisë, e cila është drejtore themeluese i Institutit STOP. Me përvojë akademike dhe profesionale në Arkitekturë dhe Menaxhim Urban dhe Mjedisor, ajo ka përvojë të gjerë në krijimin e vendeve, menaxhimin e trashëgimisë, menaxhimin e rrezikut nga fatkeqësitë dhe planifikimin e veprimit të ndryshimeve klimatike dhe rindërtimin dhe restaurimin e trashëgimisë, duke punuar me institucione si UN-Habitat, Ministria e Kulturës, Rinisë dhe Sportit dhe UNDP, ndër të tjera.
Në dekadën e fundit ajo ka vepruar si anëtare e Këshillit për Trashëgimi Kulturore të Qendrës Historike të Prizrenit dhe ka kontribuar në shumë organe lokale dhe qendrore që kanë të bëjnë me trashëgiminë dhe zhvillimin e qëndrueshëm urban.
BLERINA KANXHA
Blerina Kanxha ka studiuar Gjuhë dhe Letërsi Shqipe në Universitetin e Tiranës dhe Semiotikë në Universitetin e Bolonjës. Ajo ka vite që punon në fushën e komunikimit, duke u fokusuar në artin bashkëkohor, angazhimin e të rinjve dhe kurimin e ekspozitave në Shqipëri dhe Kosovë. Tani ajo është e angazhuar si bashkëpunëtore për komunikim dhe program në Fondacionin Lumbardhi në Prizren.
ASLIHAN DEMIRTAŞ
Aslıhan Demirtaş është themeluesja e KHORA Office, një praktikë e zgjeruar arkitekturore e fokusuar në kërkime, art dhe ekologji, e themeluar fillimisht në Nju Jork dhe tani me qendër në Stamboll.
Paralelisht me praktikën e saj arkitekturore, ajo shpesh jep mësim dhe aktualisht është duke punuar në librin e saj Graft që do të botohet nga Salt me mbështetjen e Fondacionit Graham.
OVIDIU TICHINDELEANU
Ovidiu Tichindeleanu është filozof rumun, përkthyes dhe teoricien i kulturës, duke shkruar mbi teorinë kritike sociale, historinë dhe filozofinë e shqisave, mendimin dekolonialist, epistemologjitë alternative, praktikat artistike dhe historinë kulturore.
Redaktor i IDEA arts + shoqëri dhe anëtar i bordit redaktues të L'Internationale Online. Anëtar i kooperativës së drejtuar nga artistët Stacioni Kërkimor Eksperimental për Artin dhe Jetën. Artikulli i fundit: “Ndërtimi i një institucioni të artit ekologjik”, me Raluca Voinea, në Arti për Ekologjitë Radikale, IRI 2024.
LENA VIOLETTA LEITNER
Lena Violetta Leitner është një nga bashkëthemelueset e DTAFA.
Ka përfunduar studimet për Artet Dixhitale në Universitetin e Arteve të Aplikuara të Vjenës (AT). Aktualisht, ajo është një artiste në rezidencën e Fondacionit 17 në Prishtinë (vlerësuar nga Provinca e Styria), duke kërkuar të zbulojë historitë e lumenjve të varrosur të qytetit.
Animacioni i stilit stop-motion është një mënyrë argëtuese dhe krijuese për të rrëfyer histori duke përdorur mjete të thjeshta si smartphones apo objekte të rëndomta. Në këtë punëtori, pjesëmarrësit do të mësojnë njohuritë bazë të praktikës stop-motion, prej lëvizjes nga kuadri në kuadër tek përdorimi i kolonave zanore dhe mbi mënyrën se si mund të realizojnë një film të thjeshtë e të shkurtër.
Sesionet do të nisin me një prezantim dhe me aktivitete që do të na ndihmojnë të njohim pak më mirë njëri-tjetrin dhe praktikën. Pjesëmarrësit do të shohin një seri të shembujve të njohur të filmave të stilit stop-motion, projekte studentësh dhe një punim origjinal nga instruktorja. Një diskutim mbi arkivat do të ofrojë frymëzim për rrëfimtari dhe për të hulumtuar temat e kujtesës dhe kreativitetit.
Në vijim, pjesëmarrësit do të njihen me aplikacionin Stop Motion Studio i cili mund të aksesohet falas e do të të mësojnë se si të përkapin lëvizjet, të editojnë sekuencat dhe të rafinojnë videot e tyre. Pjesa kryesore e kësaj punëtorie do të fokusohet në praktikën e dorës së lirë, ku grupe të vogla do të zhvillojnë historitë e tyre dhe do t’i bëjnë realitet përmes animacionit. Drejt fundit, ata do të punojnë me kolonën zanore të cilën do t’ia bashkangjisin projekteve të tyre para shfaqjes finale. Punëtoria do të përfundojë me një seancë me pyetje dhe përgjigje dhe me një bisedë.
Kjo punëtori është e hapur për këdo pavarësisht nivelit të aftësisë dhe është një mundësi shumë e mirë për të eksperimentuar, bashkëpunuar dhe zbuluar magjinë e rrëfimit vizual mes teknikës së stop-motion.
Më shumë për instruktoren:
Leah Clare Michaels është artiste, aktiviste, historiane, shkrimtare nga Baltimora. Ajo ka prodhuar filma dokumentarë, instalacione multimediale dhe vepra arti performuese të lidhura ngushtësisht me kërkimin historik, drejtësinë sociale dhe shkëmbimin kulturor
Ajo mban titullin B.A. në Histori me fokus në Studime Klasike nga Universiteti i Uashingtonit në Seattle në 2012 dhe një titull M.F.A. në Intermedia dhe Arte Digjitale nga Universiteti i Maryland, Baltimore County (UMBC) në 2019.
Michaels ka dhënë mësim dhe ka prezantuar në Shtetet e Bashkuara, Evropë dhe Azi, duke përfshirë një turne ndërkombëtar të dokumentarit të saj artistik Rock, Rage & Self-Defense: An Oral History of Seattle's Home Alive, të cilin ajo e bashkëdrejtoi dhe prodhoi me kolegen Rozz Therrien. Shkrimet e saj janë publikuar në BmoreArt, UMBC Magazine dhe Debutante Journal me qendër në Edinburg, Skoci. Ajo jep mësim për filmin, artin mediatik dhe studimet e kinemasë në Universitetin Towson dhe në Kolegjin e Komunitetit Anne Arundel. Asaj iu dha një grant Fulbright për në Poloninë për vitin akademik 2023-2024.
Data & Ora: 22 mars
Vendndodhje: Kino Lumbardhi
Afati i fundit për aplikim: 20 mars
Katërshja e Taxi Consilium me Dragan Todosiev në bateri, Filip Bukrshliev në kitarë, Blagojche Tomevski në klarinetë dhe Andre Mircheska në double bass, njihen për interpretimet e tyre në skenën e jazz-it në Maqedoninë e Veriut sidomos për shkrirjen e veçantë të elementëve tradicionalë me ato modernë duke rikrijuar një tingull të shqueshëm e të errët e me performanca që e marrin me vete audiencën.
Të udhëzuar nga mençuria e taksistëve që udhëtojnë në orët e vona të natës, ata e mendojnë muzikën si një hapësirë ku artikulohen jetët e njerëzve që shpesh nuk vërehen, por që gjallojnë me shumë shpirt, me rebelizëm edhe në rutinë, në ilegalitet, në ekzaltim në udhët të errëta.
Ju presim të shtunën që vjen me Taxi Consilium, në mbrëmjen e parë muzikore për vitin 2025 të programit Off the Record në Kino Lumbardhi.
Më 23 janar prej orës 19:00 do të ndjekim ligjëratën “Mbi kulturën e lumit” të antropologut e studiuesit Nebi Bardhoshi në Kino Lumbardhi. Tri lumenj: Valbona, Zall-Gjoçaj dhe Vjosa, e ndërtojnë një jetë krejt të vetën duke renduar mënyrën se si ndërtohen raportet shoqërore e kulturore përreth tyre, qoftë mes mitologjisë apo mes fenomeneve natyrore që jetësojnë apo se si njerëzit ndërveprojnë. Analiza e z. Bardhoshi vendos në komunikim këta tre lumenj e së bashku sjellin një panoramë të asaj çfarë mund të quajmë kulturë të lumit.
Bardhoshi është kërkues i shkencor me interesa specifike kërkimore në antropologjinë juridike dhe politike, antropologjinë e natyrës dhe historinë e mendimit antropologjik. Ai është autor i disa librave, përfshirë: "Gurët e Kufirit: Kanuni, Pronësia, Struktura Shoqërore" (2011), "Antropologjia e Kanunit" (2015) dhe "Etnografia në Diktaturë: Njohja, Shteti, Holokausti Ynë" (2018), bashkautor. Gjithashtu, Bardhoshi ka botuar artikuj të shumtë akademikë dhe ka shërbyer si redaktor shkencor i disa vëllimeve mbi shoqërinë shqiptare, si dhe për rajonin e Ballkanit dhe Mesdheut.
Ky është prezantimi i katërt prej serisë së ligjëratave të organizuara për projektin “Permanent Transition” mbështetur prej European Cultural Foundation.
Ky program sjell një mori hulumtuesish dhe profesionistësh e praktikues të fushës së artit, linguistikës, aktivizmit, ekonomisë dhe fushave të tjera, me synimin për të propozuar mënyra të ndryshme të të kuptuarit të krizës klimatike dhe se si mund të reagojmë në të ardhmen.
Programi muzikor Off Record, në vitin e tij të dytë ka sjellë shumë performanca në ambientet e mbyllura të Kino Lumbardhit dhe tani është koha t'ju mirëpresim të gjithëve në koncertin e fundit për këtë vit.
2024 kaloi shumë shpejt, por ne kemi një shfaqje të fundit për ju: Cats Quartet, grupi i muzikantëve të aftë kosovarë të dashuruar pas xhazit dhe inovacionit, do të vijnë në Kino Lumbardhi më 29 dhjetor duke filluar nga ora 21:00.
Cats Quartet është një grup xhaz që sjell një kombinim unik të modernes dhe klasikes, duke luajtur në forma inovative dhe duke sjellë një energji krejtësisht rinore. Fisnik Behlulin (trumpetë), Urim Maliqi (kitarë elektrike), Genc Hajziri (tastierë) dhe Cemi Tatar (bateri) do të sigurohen që ta mbyllin këtë vit me stil në vendin tonë të preferuar në Prizren.
Më 14 dhjetor prej orës 18:00, mirëpresim Ruth Noack në Kino Lumbardhi si pjesë e takimeve të programit Permanent Transition.
Ligjërata e Ruth Noack do të fokusohet në përvojën e saj në vizionimin dhe ndërtimin e The Corner në Whitman Walker, institucion kulturor në Washington D.C. i cili u hap në 2019 dhe veproi gjatë viteve të pandemisë, para se të mbyllej në vitin 2021 për shkaqe financiare. Noack, e cila ishte ftuar të përgatisë një udhërrëfyes për zhvillim të institucionit, propozoi “kopshtin” në vend të “udhës”, si koncept për formësimin e tij. Përkundër kohëzgjatjes së saj, kjo eksperiencë ofroi një mundësi për të kërkuar forma më relevante dhe përmbushëse të ndërveprimit mes artit dhe jetës.
Ruth Noack është historiane arti, kuratore, edukatore dhe shkrimtare e cila njihet më së shumti për punën e saj si kuratore në edicionin e 12 të documenta-s. Ndër të tjera ajo ka mbajtur pozicionin si drejtore ekzekutive në The Corner në Whitman Walker në Washington D. C. dhe ka kuruar ekspozita të shumta në muze dhe institucione të artit bashkëkohor.
E angazhuar si ligjeruese në akademi dhe universitete për mbi 20 vite, ajo ka mbajtur pozicionin e udhëheqëses së programit për kurim të artit bashkëkohor në Royal College në Londër, ka qenë ligjëruese në Dutch Art Institute, profesore e ftuar (AVU, Pragë; Städelschule në Frankfurt), si dhe është autore e mbi 50 eseve mbi artin bashkëkohor përfshirë këtu dhe monografinë mbi punën e Sanja Iveković.
Ky është prezantimi i tretë prej serisë së ligjëratave të organizuara për projektin “Permanent Transition” mbështetur prej European Cultural Foundation. Programi sjell një mori hulumtuesish dhe profesionistësh e praktikues të fushës së artit, linguistikës, aktivizmit, ekonomisë dhe fushave të tjera, me synimin për të propozuar mënyra të ndryshme të të kuptuarit të krizës klimatike dhe se si mund të reagojmë në të ardhmen.
Ligjëratë e Vedran Hovrat mbi politikat ekologjike në Ballkan.
Vedran Horvat do të jetë në Kino Lumbardhi më 27 nëntor, prej orës 19:30 për të diskutuar lidhur me politikat ekologjike në Ballkan, prej punës së tij si drejtues i Institutit për Ekologji Politike si dhe librit të tij “Here at last - Pathways to Green Politics in the Western Balkans”.
Në këtë libër ai trajton rëndësinë e politikave të gjelbra dhe rolin e tyre në Ballkanin Perëndimor nën lupën e rikthimit të autoritarizmit, shpërbërjes së demokracisë dhe degradimit mjedisor duke i parë këto politika si kyçe për të qenë agjentë transformues pozitivë të së ardhmes.
Vedrat Horvat është gazetar, sociolog, hulumtues, aktivist dhe autor. Prej vitit 2015 ai punon në Institutin për Politika Ekologjike në Zagreb. Në dy dekadat e fundit ai ka qenë pjesë e një sërë projekteve, nismave dhe përpjekjeve lidhur me politikat e gjelbra në Kroaci, Ballkan dhe Evropë. Si themelues dhe koordinator kryesor i Green Academy, një program i avancuar i edukimit në politikat ekologjike, ai ka operuar në udhëkryqin mes politikës, akademisë dhe lëvizjeve shoqërore.
Më shumë mbi programin:
Ky është prezantimi i dytë prej serisë së ligjëratave të organizuara për projektin “Permanent Transition” mbështetur prej European Cultural Foundation.
Ky program sjell një mori hulumtuesish dhe profesionistësh e praktikues të fushës së artit, linguistikës, aktivizmit, ekonomisë dhe fushave të tjera, me synimin për të propozuar mënyra të ndryshme të të kuptuarit të krizës klimatike dhe se si mund të reagojmë në të ardhmen.
Si ta përballojmë dimrin? Me muzikë. Mund të jetë një mënyrë.
Këtë mënyrë për ta zbutur stinën e ftohtë e kemi kthyer në një program muzikor që prej vitit 2023, duke ftuar artistë të ndryshëm vendas dhe ndërkombëtarë, për të përdorur hapësirat Kino Lumbardhit për muzikë eksperimentale.
Kësaj rradhe, Off the Record, rikthehet në fillim të muajit dhjetor me trion nga Shkupi të njohur si Svetlost. Svetlost është një grup i rëndësishëm i rrymës jazz në Maqedoninë e Veriut e muzika e tyre karakterizohet nga ritme energjike, të forta e të ndërlikuara.
Anëtarët e grupit Svetlost të krijuar në vitin 2014: Kristijan Novkovski (bateri), Deni Omegarić (bas) dhe Ninoslav Spirovski (klarinetë/saksofon) krijojnë një amalgamë muzikore elegante me nuanca të errëta, punk e të shthurura. Muzika e Svetlost ka marrë vlerësime ndërkombëtare dhe mban elemente të errëta, rrëfejnë dëshpërimin dhe trishtimin mes ritmeve dhe formave të jazz, modale dhe psikadelike.
Ata do të vijnë në Kino Lumbardhi edhe me albumin e tyre të fundit të titulluar “Everything was and it had been a minute ago” të bashkëprodhuar nga PMGJazz dhe Inverted Spectrum Records që përmban shprehi dhe përjetime të humbjeve vetjake dhe të përpjekjeve shoqërore të përditshme të trios. Në këtë paraqitje ata do të shoqërohen nga violinisti dhe kompozitori Gligor Kondovski.
Pjesë e këtij programi më parë kanë qenë Edona Vatoci, Viola Rrecaj, Agona Shporta, Tringa Sadiku, Blla Blla Blla.. (Toka Shitet), Jazzair’t, Cats Quartet, Elise dhe Ägain.