Për ta përmbyllur programin e komponentit Albumet Pandemike për këtë sezonë, Lumbardhi ka kënaqësinë që ta prezantojë albumin e fundit të grupit por-nó me titull ‘Dyftyrëshi’.

I inqizuar mes viteve 2016 e 2018 në disa studio e lokacione, ‘Dyftyrëshi’ shënon albumin në të cilin Dritëro Nikqi ka punuar më së gjati dhe me praninë më të shumtë të bashkëpunëtorëve. Pos grupit thelbësor dhe fillestar të përbërë prej Dritëro Nikqit, Nesim Maxhunit, Liburn Jupollit e Michael Haves, nuk është e ekzagjeruar të thuhet se në krijimin e albumit marrin pjesë me dhjetra muzikantë dhe se secili shton në të ngjyrën e personalitetin e vet.

Ndonëse këngët si frymëzim fillestar e kanë temën e refugjatëve që vijnë nga zonat e luftës, ato janë këngë më intime e njëkohësisht më të drejtpërdrejta ndërkohë që titulli i albumit mbetet i dyfishtë dhe i hapur për interpretim.

Ju mirëpresim të shtunën me 28 gusht, prej orës 20:30, në Kino Bahçe! Hyrja e lirë!

"A thyhen tullat përmes të qeshurës?" sjellë një përzgjedhje filmash ku takohen kinemaja dhe e qeshura, përmbysja dhe karnevali, vullneti kolektiv dhe humori. Të gjithë filmat e zgjedhur nga dekadat e para të kinemasë dhe nga dy polet gjeografike, paraqesin të qeshurën si një akt radikal dhe një pikënisje për të menduarit kritik.

Ky program u realizua me mbështetje nga Banka Raiffeisen në Kosovë, Swiss Agency for Development and Cooperation (SDC) dhe grupi KOHA.

Muzgu zanor këtë javë vjen me një qasje të re ndaj tingujve, me praninë e artistes kosovare multidisiplinare Tadi e cila mes formash të tjera shprehet edhe përmes muzikës. Për Tadin shprehja përmes muzikës në thelb transmeton të vërtetën e gjendjes njerëzore. Me kompozimet dhe miksimet e saj ajo e bën pikërisht atë, duke përsëritur ritmet arketipale të meditimeve stërgjyshore përmes rrëfimeve gjithnjë në zhvillim dhe hulumtimeve mbi tingullin dhe zhurmën. Hibridet që rezultojnë në proces në mënyrën më të mirë i zbulojnë mutacionet tona njerëzore dhe i bëjnë ato të dëgjueshme.

Tadi dhe motra e saj Anisa do ta ngrohin atmosferën përmes interpretimit të tingujve të frymëzuar nga muzika persiane në defin iranian Erbane dhe defin turk Bindir. Mos e lëshoni këtë mundësi!

Biletat me çmim prej 2 eurosh janë në shitje te kafeja e Lumbardhit dhe në hyrje para koncertit. Ju mirëpresim në Kino Bahçe!

Ky koncert u mundësua me mbështetjen e Swiss Agency for Development and Cooperation (SDC) dhe të Ministrisë së Kulturës, Rinisë dhe Sportit.

Fondacioni Lumbardhi ka kënaqësinë ta prezantojë Kinofigurimi: një arkiv i hapur, ekspozitë mbi historinë e Kino Lumbardhit dhe raportin e kinemasë me modernitetin në Prizren, bazuar në studimin arkivor të Tevfik Rada dhe Bengi Muzbeg.

Kinofigurimi: Nje arkiv i hapur është ekspozitë që përmban fotografi, objekte, dokumente e artikuj të integruar në ndërtesë, nga zyret në sallë, e nga lozhat deri në dhomë të projeksionit. Pjesët dhe ‘mbetjet’ arkivore të prezantuara nuk e krijojnë një tregim të plotë dhe nuk janë të bazuara në ndonjë rend kronologjik, por janë të pakompletuara dhe të hapura për interpretime. Ato me shumë gjasojnë në një kompozicion kinematik dhe jo-linear që përmes fragmenteve theksojnë aspekte të kësaj historie te ndërlikuar.

Kinofigurimi: Një arkiv i hapur do të hapet me 9 gusht nga ora 18:00, te Kino Lumbardhi dhe do të qëndrojë hapur deri me 27 shtator, 2021. Ekspozita do të shoqërohet me ngjarje, botime dhe biseda që ndërlidhen me studimin dhe historinë shumështresore të Kino Lumbardhit.

Kinofigurimi është realizuar në partneritet me Forum ZFD, zyra në Prishtinë, dhe është mbështetur nga Ministria e Kulturës, Rinisë dhe Sportit, Fondacioni për Iniciativa të Artit (FfAI), Banka Raiffeisen në Kosovë dhe Agjencia Kosovare e Privatizimit.

Të shtunën, me 31 korrik nga ora 20:30, mirëpresim rikthimin e mikut të Lumbardhit Ilir Bajri, kësaj rradhe në kuadër të programit ‘Albumet Pandemike’. ‘Introspective’ quhet koncerti që Ilir Bajri trio e sjellë për ta freskuar atmosferën në Kino Bahçe. Iliri do të shoqërohet nga Kiril Tufekcievski në bas dhe Viktor Filipovski në bateri.

Biletat me çmim prej 3 eurosh janë në shitje te kafeja e Lumbardhit dhe në hyrje para koncertit. Ju mirëpresim në Kino Bahçe!

Ky koncert mbështetet nga Swiss Agency for Development and Cooperation (SDC) dhe Grupi Koha.

Lumbardhi ka kënaqësinë që ta mirëpresë programin intrigues të filmit nga Kolektivi Habibi: "Tregime të grave nga SWANA".

Themeluesja e Kolektivit Habibi Róisín Tapponi paraqet katër dokumentarë që përshkruajnë jetën dhe historitë e grave ripërtrirëse dhe të mprehta nga Azia jug-perëndimore dhe Afrika e veriut. Nga një gjyshe e bezdisur nga burrat te një grup i grave socialiste që luftojnë për të drejtat e tyre, ky grup i grave tregon larminë e rrëfimeve feministe dhe fuqinë humane të krijimit të filmit dokumentar. '

Përshkrimet e hollësishme të dokumentarëve që do të shfaqen në dy javët e ardhshme do të pasojnë ditëve në vijim! Na ndiqni për detaje!

Ky program është zhvilluar në partneritet me Kolektivin Habibi, me mbështetjen e Bankës Raiffeisen në Kosovë dhe Koha Group.

4 për 20! Ngrohje për Dokufest!

Me afrimin e gushtit, ndjehet energjia e një prej festivaleve më të jashtëzakonshme në rajon! Këtë vit, Dokufest do ta festojë edicionin e 20-të! Ndërsa përgatitjet e festivalit janë në finalizim e sipër, drejtori artistik i festivalit, Veton Nurkollari ka përzgjedhur hollësisht 4 kult filma kreativë për t'u shfaqur në një program ngrohjeje të mikpritur nga Lumbardhi.

Këtë të shtunë, më 10 korrik, si pjesë e programit 'Muzgu Zanor', të ftuar e kemi këngëtarin dhe kitaristin Plator Gashi.

I lindun dhe i rritun në Prishtinë, Platori është dashamir i folklorit, letërsisë gojore e llojllojshmërisë gjuhësore, aspekte të cilat përpiqet me i shkri e ndërfutë në eksplorimet e tij muzikore. Përveç kangës shqipe, Platori tërheq frymëzim edhe nga traditat e gjinitë e tjera muzikore, sidomos bossa nova braziliane, për me i ndërtu e stolisë përpunimet e tij.

Dyert hapen në orën 19:30 kurse performanca nisë në orën 20:00. Pas performancës, një play-listë me frymëzuesit muzikorë të Platorit, do të na shoqëron deri në orën kufizuese të muzikës, 22:45.

Biletat me çmim prej 2 eurosh janë në shitje te kafeja e Lumbardhit. Ju mirëpresim në Kino Bahçe!

Ky koncert mbështetet nga Bashkimi Evropian, në kuadër të projektit "Hapësirat Kulturore të Kosovës" dhe Komuna e Prizrenit.

Albumet Pandemike #1: SYTË: Divine Computer

Lumbardhi me entuziazëm prezanton performancën e parë të serisë Albumet Pandemike si nëndegëz e re e ‘Variacionet e dëgjimit’!

Bendi nga Prishtina SYTË do ta elektrizojë mbrëmjen e së shtunës, me 26 qershor, duke nisur nga ora 20:30, me tingujt e tyre që valëviten mes R&B-së dhe indie-popit.

Kjo performancë jep fokusin albumit “Divine Computer", që u publikua gjatë fillimit të pandemisë. Suksesi i albumit ka arritur ta tërheqë edhe vëmendjen e disa mediave ndërkombëtare.

SYTË janë vokalistja Nita Kaja, Drin Tashi në sint, bateristi Granit Havolli dhe basisti Fatlind Ferati.

Bileta për koncert mund të gjindet te Lumbardhi, me çmim prej 3 eurosh.

Ky koncert mbështetet nga Komuna e Prizrenit dhe KTV.

Në kuadër të programit KINO, ‘Të dielat në Kino’ do t’i sjellë në ekran të madh disa nga filmat më intrigues nga historia e kinemasë. Ejani dhe shijoni shfaqjet nën qiellin e hapur, çdo të dielë, mes 6 qershor- 4 korrik, nga ora 20:30 në Kino Bahçe!

‘Të dielat në Kino’ u mundësua me përkrahjen e Ambasadës Franceze, Institutit Francez si dhe Bashkimit Evropian, në kuadër të projektit "Hapësirat Kulturore të Kosovës".